• اكتب معانا
  • ماتنسناش
  • تابعنا
الموضوع اللي جاي
فلسطيني جمع 5 آلاف قطعة أثرية في بيته عشان يثبت إن الفلسطينيين هما أصحاب الأرض
الموضوع اللي فات
الحكومة هتنضف أكتر من 800 سطح في عمارات وسط البلد

"ماحدش بيختار اسمه" .. حكايات ناس غيروا اساميهم

-

الحكاية بتبتدي من الإفيه "اسمي أمير المصري وبيدلعوني يقولولي وائل عبد السلام، ماما كانت عايزة تسميني أمير، وبابا كان عايز يسميني وائل بس تقدر تندهلي بـ (يا جلال).."
لما قعدت مع زمايلي في الشغل بنتكلم عن موضوع تغيير الاسامي، زميلنا قال إن له صاحب اسمه الثلاثي بيطابق اسم من اسامي السياسيين اللي كانوا موجودين قبل الثورة، وكان بيحاول يغيره عشان المشاكل اللي بتحصله بسبب التشابه، بس لما اتحكاله إن الموضوع صعب. قال بلاش منه وفضّل مايغيروش، أو كسل وده الأرجح.
احنا بنتولد بنلاقي إن أهالينا اختاروا اسامينا على حسب أهوائهم أو دوافعهم أو مواقفهم مع الاسامي اللي بيختاروهالنا، ومالناش يد في تغييره لحد ما نبقى واعيين ونبدأ ناخد موقف، بس أغلب الناس اللي بقابلهم بيبقوا فاكرين الموضوع صعب وبياخد وقت ومجهود. وده اللي خلانا ندوّر ونتكلم مع ناس قدروا يغيروا أسمائهم:

لحقونا وغيّروا أسامينا وإحنا صغيرين
بتحكيلنا "إسراء": "كان اسمي (نعمة) وبابا كان مسميني الاسم ده على اسم عمتي اللي اتوفت، بس كنت بسمع تريقة كتير جدًا بالذات وأنا صغيرة، وقبل ما أدخل المدرسة بفترة صممت إني مروحش بالاسم ده وإني عايزة أغيّره، وانتي عارفة لما طفل بيعند أو يبقى زنان على حاجة"
بتكمل: "بابا وافق بعد ما حس إن مفيش مهرب من التريقة عليّا ومن اصراري كمان. وقتها سألني حابّة تتسمي إيه؟ واخترت (إسراء) وبالفعل تم تغييره"
طبعًا الفضول شدنا نعرف إيه سبب اختيارها للاسم ده، قالت: "كان اسم صاحبة طفولتي، وكانت الوحيدة اللي مابتتريقش عليّا، مش زي باقي العيال. وكبرنا سوا ووقفت جنبي في جوازي ولحد النهاردة. أنا مديونة ليها بكل حاجة، حتى اسمي"
وقبل ما نخلص كلام "إسراء" قالت: "على فكرة بابا هو الشخص الوحيد اللي لسه بيندهلي بـ نعمة"

نفس الموقف حصل مع "فادي" بس بتغيير تفاصيل بسيطة، اللي والده سماه "فتحي" تسمية على اسم والده، الجد، اللي اتوفى لما كان والد "فتحي" عنده سنتين. طبعًا العِيلة كانت متأزمة بسبب الاسم ده، بس ماحدش كان بيقدر يضايق الأب أو ييجي جنب المنطقة المحظورة دي، لحد ما في يوم صاحب "فتحي" كلمه في التليفون وقال عايز أكلم "فادي"
بس لسوء الحظ إن الأب هو اللي رد وماكنش عارف مين فادي؟ واكتشف إن كل الناس بتناديه بالإسم ده، فـ اضطر يغير اسم الابن بس طبعًا على مضض.

ولما تحب تغيَّر اسمها وهي كبيرة؟

ده اللي قابلته وكان مختلف مع "حميدة" اللي كانت متأقلمة مع الوضع ومش مأزمها، لحد ما تمت 25 سنة، وقتها قررت إنها تغيره لـ "حبيبة"، وحاولت تقنع أهلها لحد ما وافقوا، وراحوا المحكمة قدموا دعوى بتغيير الاسم، والموضوع كان أسهل في حالتها لإن كان معاها موافقة من أهلها، وإنه من الأسماء اللي في قايمة بيسهل على القاضي الموافقة على تغييرها، بتبقى أسامي قديمة زي: "نفيسة، ست الدار، إلخ..."

فيه أسامي بقت ممنوعة في مصر ومحظور دخولهم السعودية
أغلب الحالات دي كان عادي نقابلهم، لحد ما قابلت "عبد النبي"، اللي كان عايز يروح يعمل عمرة في السعودية، وكان فاكر الموضوع بسيط، ماكنش يعرف إن فيه أسماء محظور دخولهم السعودية، زي "عبد النبي/ عبد العاطي/ ملاك/ تبارك، إلخ..." فـ اضطر انه يغير اسمه لـ "عبد الله" عشان يقدر يسافر، وبالفعل قدر يغيّره.
وحاليًا القانون المصري بقى بيمنع التسمية بـ أسماء زي: "عبد السيد، عبد الرسول، عبد النبي".

المحكمة بترفض تغيير الاسم الإسلامي
زي "خديجة، عائشة، محمد، فاطمة"، وبتبرر ده بـ إن قانون الأحوال الشخصية مستمد من الشريعة الإسلامية، يعني لو اسمك محمد ومسلم، هيكون إيه الداعي لتغييره؟
وكذلك بترفض تغيير الاسم لو مفيش مبرر قوي يستدعي ده، يعني لازم تكون متأزم من اسمك أو عندك مشكلة كبيرة بسببه عشان تاخد الموافقة!

وده اللي كانت خايفة منه "إنعام" لما اتكلمنا معاها:"على فكرة ناس كتير كانوا بيقولولي "أنعام" بس هو مابيتنطقش كده! وحاولت كتير أقنع أهلي بتغييره مش بس بسبب المضايقات، لكن لأسباب عملية في الشغل منها إن ماحدش بيعرف يقراه وبالذات لو كتبته انجليزي مثلًا، ووالدي ماقتنعش غير لما أخد رأي صاحبه (مُصحح لغوي) وقال إن "أنعام" مرادف لكلمة حيوانات. وقتها اقتنع وغيّرته" 
- طب غيرتيه وبقى إيه؟
= "اسمي بقى "هالة" ولو هتسأليني ليه اخترت الاسم ده، هقولك انه اسم ماما اللي كانت مصدومة لما عرفت إني اخترت اسمها عشان يكون اسمي الجديد. وده بعد مناقشات كتير في البيت لاختيار اسم جديد، وإني مرتاحتش للفكرة دي، ولسه هتعوّد عليه؟ فـ اخترت اسم بحبه وفي نفس الوقت مألوف بالنسبالي. 
وبالفعل رُحت المشوار ده للسجل بنفسي وغيّرته لـ هالة، وبعد شهر ونص أخدت إقرار المحكمة من السجل وطلعت شهادة ميلاد جديدة وبطاقة جديدة.

رحلة الإجراءات صعبة زي ما بيقولوا ولا أسهل مما نتخيل؟
- لو عندك طفل عمره يوم لحد قبل ما يتم 7 سنين:
بتروح السجل المدني التابع للمنطقة اللي ساكن فيها، وفي إيدك أصل شهادة الميلاد بتاعت ابنك، ومعاك/ي شهادة ميلاد ليك وللزوج/ـة، والبطاقة الشخصية ليكم، وقسيمة الجواز، وبتملوا البيانات وبتكتبوا إقرار بتغيير الاسم من مدير مكتب السجل المدني، دوركم هنا بينتهي، وبيبدأ دور السجل المدني اللي بيودي الورق لـ مصلحة الأحوال المدنية اللي بدورها بتودي الورق للمحكمة اللي بتطلّع حكم بتغيير الاسم.
الموضوع ده كله بياخد من اسبوعين لـ 3 أسابيع وأوقات شهر، وبترجع البيانات الجديدة لمكتب السجل المدني اللي عملنا فيه المشوار ده، بتاخد منهم النموذج وتروح بيه لمصلحة الأحوال عشان يستخرجوا شهادة ميلاد جديدة للابن.
الموضوع مش صعب، مشوارين صح؟

طب لو أنا شخص كبير؟
بتروح السجل المدني ومعاك الأوراق المطلوبة: شهادة ميلادك وبطاقتك الشخصية، والمؤهل الدراسي، وقسيمة جواز الأهل وأرقامهم القومية، وبتقدم طلب للسجل بتكتب فيه البيانات وأسباب التغيير، ومن السجل للمحكمة، وبعد مدة بترجع السجل تسأل هل فيه إقرار من المحكمة جه ولا لأ؟ ولو حصل، بتاخد الإقرار يبقى معاك وبتطلع بيه الأوراق الرسمية اللي باسمك القديم وأي ورقة رسمية انت محتاجها بعد كده.
الرحلة دي ممكن تاخد منك وقت وشوية مجهود بس مش صعبة ولا مستاهلة تكسّل عشان تعملها.

Home
خروجات النهاردة
Home
Home