• اكتب معانا
  • ماتنسناش
  • تابعنا
الموضوع اللي جاي
نص مليون طفل مصري حملوا ألعاب خطرة على تليفوناتهم في 2018
الموضوع اللي فات
وزارة الصحة: ربع المصريين بيعانوا من اضطرابات نفسية

"بعت المحل بتاعي عشان حلمي": حوار مع مؤسس أول اتحاد مصري للمصارعة الحرة

كابتن أشرف كابونجا

حصة المجالات وحصة المكتبة وحصة الألعاب، دي المواعيد الأسبوعية لماتشات المصارعة بين الطلبة في المدرسة، وبرضه مكان مناسب للولاد الأخيار اللي مش حابين يشاركوا، عشان يحكوا لزمايلهم المصارعين  الأشرار، عن قصة الولد اللي جه يعمل حركة مصارعة لزميله موته بالغلط، أو وقع وقعة مش مظبوطة وضهره اتكسر، ومافيش أحسن من ده مكان برضه عشان نتخانق خناقة المصارعة حقيقية ولا تمثيل.

يوم التلات هو أقل يوم في نسب الحضور الدراسي، عشان قناة ART بتذيع عرض WWE لايف الساعة 7 الصبح. الولد الأكثر شهرة ما بينا في الشلة، هو اللي بيلعب كورة حلو وبيعرف يعمل "السوستة" بتاعت شون مايكل. ممدوح فرج هو أعظم بطل في الدنيا وكل المصارعين اللي بنشوفهم دول أصحابه وبيسهروا عنده بالليل.

أكيد في واحد صاحبك كنت بتلعب معاه كورة في الشارع، بس هو كان لاعيب عنك وكمل في الكورة ولعب في أندية. في كمان واحد صاحبك اللي كنتوا بتعملوا لبعض حركات المصارعة، وأنت كبرت وبطلت تتفرج، وهو كمل وفضل الهوس بالشو ده معاه وحلم إنه يكون مصارع في يوم من الأيام، بس الإمكانيات في مصر ماتسمحش، بس يمكن في يوم يكلم كابتن أشرف محروس أو "أشرف كابونجا"، يقوله يا كابتن أنا عاوز انضم للفريق بتاعك وألعب في أول اتحاد مصري للمصارعة الحرة EWR

قرية صغيرة على طريق فايد في محافظة إسماعيلية، بني فيها "أشرف" الحلبة بتاعته، وجهز مكان بسيط لفريقه الكون من 50 لاعب وبيضم بنات كمان، بس البداية بالنسبة لمؤسس الاتحاد كانت من قبل كده بكتير، بيحكي "أشرف": "بدايتي في الرياضة وأنا عندي 16 أو 17 سنة لما كنت بلعب كونغ فو وأخدت فيه كذا بطولة عربية وأفريقية، بعدها دخلت الجيش ولعبت جودو واتوغلت أكتر في الألعاب القتالية الفردية بأنواعها". حسب "أشرف" فكرة اتحاد مصارعة حرة مصري جاتله وهو في الجيش ولما بدأ يمارس اللعبة كان زي حالاتنا، بيلعب مع أخوه على مرتبة في البيت، "إلى جانب خبرتي الكبيرة اللي اكتسبتها من الجودو والألعاب القتالية فاتعلمت الحركات والسقطات المختلفة وأتقنتها، لحد ما بقيت أقدر أدرب فريق".

المكان وشكل الحلبة والظروف المحيطة، بتقول إن الولاد دول "بيغزلوا برجل حمار" حرفيًا، وإلا كان هيبقى عندهم على الأقل نادي يتمرنوا فيه، بيشرحلي "أشرف": "احنا على الساحة من 5 سنين وكنا بنتدرب في القاهرة، بس الدنيا اتغيرت أو مش عارف إيه اللي حصل، بس النوادي بقت تطلب مننا مبالغ، أقل حاجة 10 آلاف جنيه شهريًا، وأنا ماباخدش فلوس من اللاعيبة اللي معايا ومتكفل بكل حاجة في الموضوع ده. كان معايا محل وبعته وكان حاجات كتير وبعتها عشان أوصل لحلمي، وبنيت الحلبة دي هنا قدام بيتي، كلفتني أكتر من 40 ألف جنيه، والفريق بتاعي كلهم فقرا وأقل من الفقرا كمان فمش عاوز أكون باجي عليهم، وكلنا عشمانين إننا نوصل في الفترة الجاية لراعي يصرف علينا".

بيتجمع "أشرف" مع الفريق بتاعه ويعسكروا في بيته أيام الخميس والجمعة والسبت من كل أسبوع، بحيث يكون عندهم وقت يتدربوا ساعات توصل ل12 ساعة، فيقدروا يتقنوا الحركات ويحفظوا التعليمات. الفريق بيضم لاعيبة من كل المحافظات، وفي حتى لاعب من الهند واتنين من العراق. الكل بيبدأ تمرين من 8 الصبح بتدريبات خفيفة وسويدي وبعدها اتفرجنا على ماتشات ما بينهم وبين بعض، بيركز فيها "الكوتش" دقة تنفيذ الحركات، والأهم دقة تنفيذ السقطات والوقعات، عشان الضربة تطلع بشكل حلو قدام الجمهور.

يعني اللي بتعملوه ده كله شو وتمثيل والمصارعة مش بجد؟

بيجاوب "أشرف": "الناس فاهمة إن المصارعة تمثيل 100% وناس فاهمة إنها حقيقية 100%، هي بتتجزأ من 60 ل 70% حقيقية، الباقي كله شو. الشو عبارة عن إن اللاعب اللي داخل عليا عارف أنا هضرب إيه وهضربه ازاي، فبيديني الطرحة عشان شكل الضربة يبان بجد. الضربة ممكن توصل بنسبة 20% أو 30%  أو 100% أو ماتوصلش خالص، بس لازم قدام الناس يبان إنها وصلت 100% عشان ماضيعش حلاوة الشو بتاعي. احنا زي مسرحية أو فيلم أكشن بنعمله". بان كلام أشرف أكتر من مرة في التمرين، لما اللاعب يقع على الأرض بشكل وحش فيبان إن الضربة fake، ساعتها بيقف التمرين لغاية ما الضربة تطلع بشكلها الصح.

الاتحاد موجود على الساحة من 4 أو 5 سنين، مؤخرًا بدأوا يتعرفوا بسبب فيديوهات وصور فيسبوك انتشرت لعروضهم في المحافظات، واللي بيستخدموا فيها الألوان والاستعراضات وكل لاعب بتكونله شخصية بيجسدها، بيقول "كابونجا": "احنا أكتر ناس بيتفرجوا علينا أطفال، من أقل من 8 سنين لحد سن 30 سنة، دول اللي بيحبونا. واحنا صغيريين كنا بنحب ماروكلي والنمر وحاجات زي كده، دايما كان الهيرو بتاعنا بطل الكارتون، فأنا حبيت أجسد الحاجات دي في المصارعة، فتلاقي عندنا شخصيات زي القرد، في سبايدر مان، في المجنون، الرعب، الشيطان.. إلخ. بحاول أخلي الأطفال والكبار يسمعونا وأدخل عليهم البسمة". الفريق يعتبر رحالة، وطول فترة شغلهم عملوا عروض في محافظات مختلفة زي القاهرة وإسكندرية والقليوبية والسويس وإسماعيلية والبحيرة والجيزة.

أي واحد متابع المصارعة الحرة عن قرب، عارف إن WWE اتحاد المصارعة الأشهر، بيفرض ضوابط داخل وخارج الحلبة على لاعيبته، يعني في حركات ممنوعة، والحركات المسموح بيها لازم تتنفذ بشكل معين، غير تعليمات دايمة للسلامة وتحليلات منشطات.. إلخ. "أشرف" وفريقه بيطبقوا نفس الحاجة بينهم وبين بعض، "ممنوع ضربات اللي ممكن تؤدي لكسور أو إغماءات أو موت، ممنوع ضرب آخر فقرة في الضهر أو تحت الحزام أو ورا الودن أو في الزور أو خلف الرأس، بس بعلمهم الحاجات دي عشان يعرفوها، كمان بعلم كل لاعب ازاي لو اتصاب يكمل لعب على إصابته من غير ما تتفاقم، غير إني جايبلهم حد من وزارة الصحة يعلمهم الإسعافات الأولية".

حاجات كتير لاعيبة الاتحاد نفسهم يوصلولها، منها اللي قدروا عليه ومنها اللي لسه بيجروا وراه، بيوضح "أشرف": "قدرت أسجل الاتحاد كشركة رياضية وبقى معانا سجل تجاري وبطاقة ضريبية وعملت للاعيبة كارنيهات، كمان على تواصل مع وزارة الشباب والرياضة وهما مبسوطين جدًا من اللي بنعمله. الفترة الجاية مافضلش غير الراعي عشان نقدر نقول احنا أهوه ونوصل بعروضنا للعالم العربي وكل الدنيا إن شاء الله".

 

 

 

Home
خروجات النهاردة
Home
Home