• اكتب معانا
  • ماتنسناش
  • تابعنا
الموضوع اللي جاي
فيديو: السعودية قطعت شجرة اتربى عندها النبي
الموضوع اللي فات
التعبئة والإحصاء: معدلات البطالة قلت 11 %

8 أفلام هتعرفك أسرار الموسيقى في العالم العربي

الحروب في فلسطين والعراق عملت موسيقى مهمة ومختلفة

المزيكا مش بس الآت موسيقية بنسمعها ونطرب ليها ونضحك، ولا الأغاني مجرد كلمات بتتغنى .. كل تراك بيتلعب بيبقى وراه قصة وحكاية مبيعرفهاش غير اللي بيدور وراها وعشان كده الأفلام الوثائقية اللي بتتكلم عن الموسيقى في العالم العربي من أهم الأفلام، خصوصًا كمان لو حاجات نسيناها او منعرفهاش ..

Umm Kulthum: A Voice Like Egypt (1996)

ده أول فيلم اتعمل بالإنجليزي عن أم كلثوم، كوكب الشرق اللي لسه بنسمعها لحد دلوقتي، إنتج الفيلم ده واخرجه ميشيل جولدمان اللي بيبدأ فيلمه من مكان ولادة أم كلثوم ويوصل لمكان عملها في القاهرة، في الفيلم فيه مقابلات مع ناس مختلفة بيحكوا حكاياتهم مع أم كلثوم من أطفال صغيرين لحد نجيب محفوظ.

We Loved Each Other So Much (2003)

فيروز مش هي ابدًا كلمتين الفيسبوك والعمق والقهوة، الموضوع أكبر من كده بكتير .. الفيلم بيتكلم عن "الست فيروز" أعظم مغنية لبنانية من خلال عيون اللي بيحبوها في لبنان من كل الميول السياسية والدينية، الحاجة الوحيدة اللي بتجمعهم كلهم على اختلاف توجهاتهم هو حب فيروز، الفيلم بيورينا اللي بيحصل في لبنان والجوانب الاجتماعية والثقافية والحرب الأهلية والذكريات المؤلمة اللى بيبقى فيها حاجة واحدة بتلمع وهي صوت فيروز.

Heavy Metal in Baghdad (2007)

الحرب دمرت كتير في العراق، وخليت حاجات كتير تختفي وميبقاش ليها وجود، من ضمن الحاجات دي فرقة Acrassicauda اللي صمم صناع الفيلم انهم يدوروا على اعضاءها اللي الحرب دمرت مدينتهم، المقابلات مع اعضاء الفرقة وهما بيحكوا عن الآمهم والصعوبات اللي قابلتهم عشان يحافظوا على حياتهم ومزيكتهم في وسط مجتمع بيتدمر.

El Gusto (2012)

فيلم وثائقي فرنسي-إيرلندي بيحكي عن فرقة El Gusto الفرقة الجزائرية اللي كان فيها مجموعة موسيقين يهود ومسلمين بيجمعهم حب الموسيقى الشعبي، "يا رايح وين مسافر تروح تعيا وتولي" الكلمات الجزائرية اللي بترن في ودانك في الفيلم بتحكيلك ازاي قدر البحر يفصل اعضاء الفرقة لما اضطر اليهود يسافروا فرنسا، وازاي اتقابلوا تاني بعد 50 سنة في لحظة استثنائية.

Electro Chaabi (2013)

الفيلم بيحكي عن المهرجانات اللي بدأت مع الثورة المصرية وانتشرت في كل البلد، وازاي الأصوات اللي كانت بالنسبة للناس الأول "دوشة" بقت بتعبر عنهم وعن حياتهم ومفيش فرح يخلى منها، الالكترو الشعبي بقى يشتغل في التوكتوك والميكروباصات والشوارع وكل حتة في مصر وبيتغير شكله كل يوم ومحدش بيقف قدامه.

Les Petits Chats (2015)

دي الفرقة اللي كان بيعزف فيها عمر خيرت درامز، ومن ضمن اعضاءها عزت أبو عوف، الفرقة اللي بدأت في 1967 وكانوا اعضاءها نجوم السبعينات لدرجة إن ملكة جمال المعمورة كانت بتكسب ساعتين في العربية مع نجم الفرقة، شريف نخلة مخرج الفيلم صور كواليس تجمع الفرقة تاني في 2009 عشان يعملوا حفلة أخيرة ليهم وازاي المجتمع اتغير بعد كل السنين دي.

Yallah! Underground (2015)

الفيلم ده بيتكلم عن الفرق المستقلة في القاهرة وبيروت وعمان ورام الله، 4 سنين ماكنش المخرج عارف يخلص الفيلم لكن صمم لحد ما طلع الفيلم اللي بيحكي ازاي مزيكا الاندرجراوند بقت هي أساس المزيكا في العالم العربي دلوقتي.

From Beneath the Earth (2017)

"من تحت الأرض" هو فيلم وثائقي قصير بيحكي عن صراعات وحياة 5 فنانيين فلسطينيين بيحاولوا يعملوا مزيكا تعبر عنهم وعن حياتهم، ورغم إن الفيلم 21 دقيقة بس لكنه بيحكي عن صناعة الفن تحت الاحتلال وازاي ده ممكن يكون ملهم.

 

لو عايز تقرأ قائمة الأفلام كاملة ممكن تدخل على اللينك ده.

 

Home
خروجات النهاردة
Home
Home